Gentiana Shabani viziton Medvegjën

Gjilan – Të hënën koordinatorja e Zyrës për Preshevë, Bujanoc dhe Medvegjë, znj. Gentiana Shabani ka zhvilluar takim në Komunën e Medvegjës, ku u prit nga ndihmësja e kryetarit të Komunës së Medvegjës zonja Leme Xhema dhe zëvendës kryetari i kuvendit Komunal në Medvegjë z. Florim Sahiti njëherit kryetar i Partisë për Veprim Demokratik (PVD) në Medvegjë.

Zonja Lema dhe zotëriu Sahiti në fillim të takimit e njoftuan koordinatoren për jetën politike, ekonomike, sociale dhe arsimore në Komunën e Medvegjës, për të drejtat e shqiptarëve në këtë Komunë dhe numrin e përgjithshëm të shqiptarëve të cilët punojnë në institucionet komunale në Medvegjë.

Ndërsa koordinatorja Shabani e informoi për punën e Zyrës për Preshevë, Bujanoc dhe Medvegjë, aktivitetet e fundit të zyrës dhe sfidat nëpër të cilat po kalojnë qytetarët e dëbuar nga Kosova Lindore. Ajo njëkohësisht kërkoj nga nikoqirët e takimit zonja Lema dhe z. Sahiti, krijimin e urave ndërlidhëse në mes Komunës së Medvegjës dhe institucioneve zyrtare në Republikën e Kosovës, konkretisht me Zyrën për Preshevë, Bujanoc dhe Medvegjë me qëllim që të jemi sa më afër këtyre qytetarëve dhe bashkërisht të mundohemi të gjejmë modusin adekuat për zgjidhjen e problemeve shumë vjeçare të qytetarëve të Kosovës Lindore.

Në fund të takimit, palët u dakorduan që bashkërisht të krijojnë argumente juridike dhe të gjejnë solucionin më imediat për zgjidhjen e problemeve të qytetarëve të dëbuar të Kosovës Lindore të cilët jetojnë në Republikane Kosovës, e të cilëve fatkeqësisht kohëve të fundit pushteti serb ka filluar edhe t’ua pasivizoj vendbanimet dhe disa nga ta edhe t`i shlyej nga listat e gjendjes civile në Serbi./rajonipress/