Gazmend Freitag ekspozon në Vjenë

“Në hapësirën e veçantë për vepra arti “Der Kunstraum” në qendër të Vjenës u hap ekspozita… motivet artistike të piktorit janë bukuria e femrës, peizazhet nga natyra, e veçanërisht Prizreni me urat e vjetra nga guri… në Kosovë është një frymë tjetër e pikturave.

Ditë më parë piktori i njohur, i cili jeton në Austri, Gazmend Fraitag, hapi ekspozitën e radhës në kryeqytetin austriak, e cila me sukses po vizitohet nga shumë dashamirë të artit pamor. Vjena është vend ku vlerësohet arti dhe ekspozimi artistin e ngre para përgjegjësisë dhe kritikës së mirëfilltë.

Në hapësirën e veçantë për vepra arti “Der Kunstraum”, në qendër të qytetit, punimet në pikturë do të qëndrojnë për vizitorë më shumë se një muaj, deri më 7 korrik. Ishte kjo ekspozitë e iniciuar nga piktori austriak, Eddie Mülller, nga Linci, e organizuar nga reporteri për kulturë, Joe Leiner. Në hapje të ekspozitës ishin prezentë shumë figura arti dhe mërgimtarë shqiptarë nga shoqatat dhe klubet e ndryshme shqiptare dhe vendëse.

Hapjen e ekspozitës e bëri krijuesi Hubert Thurnhofer, autori i veprës “Das Testament des Damien First”, e cila e kishte edhe ditën e promovimit. Në mbrëmjen e hapjes ishin të pranishëm më shumë se 80 mysafirë nga të gjitha zhanret e krijimtarisë dhe mërgimtarë shqiptarë artdashës. Nga Ambasada e Kosovës ishte z.Anton Marku, këshilltar, i cili i përshëndeti të pranishmit.

…ekspozitat

Pas disa sukseseve me ekspozitat e tij në Gjermani që nga vitet nëntëdhjeta, serinë e ekspozitave në Austri e fillon në vitin 2008, në Peuerbach, e në “Atrium” Bad Schallerbach, duke vazhduar me sukses në disa qytete të tjera. Këtë vit ekspozoi në “Galerie – Halle” në Linz, në “Café Kronberg” (2013) në Scharten dhe kjo tani e hapur në Vjenë. Gazmendi është prezantuar me sukses me punimet e tij në antologjinë e krijuesve shqiptarë në Austri “Iliricum”, vepër e Shoqatës Kulturore “Aleksandër Moisiu” në Austri.

…motivi

Motivet në krijimtarinë artistike të piktorit janë bukuria e femrës, peizazhet nga natyra, e veçanërisht Prizreni me urat e vjetra nga guri, ku piktori kaloi një pjesë të jetës së tij rinore si gjimnazist. Ai e preferon pikturimin me ngjyra vaji në kanavac, në grafikë dhe disa me laps. Talentin e tij gjithmonë e ka shprehur me pikturë që nga fëmijëria e tij në Prizren, ku mësoi në shkollën fillore dhe në gjimnaz, muret e të cilave ishin të zbukuruara me pikturat e tij. Kjo e mbushi krijuesin me besim në artin e tij dhe e bëri të lumtur në rrethin shoqëror.

Tani krijimtarinë e tij e realizon me sukses në Austri. Ekspozitat e tij gjithnjë në rritje në cilësi e sasi e shprehin shpërthimin e energjisë së autorit me vrull të pandalshëm. Në shaka piktori do shprehet: “Unë kam aq shume motive dhe energji të akumuluar saqë më duhet ndoshta edhe një jetë e dytë për t’i realizuar ato. Ura e gurit në Prizren më ka fascinuar, të cilën unë dy here në ditë e kaloja përderisa isha gjimnazist në Prizren. Ndërsa Kalaja e lashtë në prapavijë dhe qielli i kaltër në horizont, janë motiv shumë i preferuar edhe sot për mua. Fytyrat e njerëzve dhe karakteristikat e tyre janë shumë prezentë në vizatimet e mia. Ato i punoj me ngjyra vaji në kanavace, tush dhe laps të thjeshtë. Aktet nudo janë domosdoshmëri thuajse për çdo piktor”. Ky është Gazmend Freitag, njeriu ynë i cili imazhin tonë e ngre nëpërmes brushës së tij, qëndrimit të tij prej artisti e njeriu që krijon madhështinë e të bukurën, e cila do të jetojë gjatë. Vendlindja nuk të lë të qetë, të thërret kudo që je në përkujtimin e peizazheve nga syri i një kohe që nuk harrohet. Dashuria ndaj vendlindjes e mbjell në shpirt, është navigator në çdo cep të globit. Këtë e dëshmon edhe artisti ynë.

Kush është Gazmend Freitag

Gazmendi lindi në vitin 1968 në fshatin Pataqan i Poshtëm. Është fëmija i tretë me radhë nga pesë djemtë e Asllan dhe Qamile Mustafës. Posa përfundoi shkollën e mesme, regjistrohet në Fakultetin Juridik në Prishtinë. Rrjedhat në Kosovën e robëruar, kur edhe mbyllet universiteti e detyron Gazmendin ta braktisë vendlindjen në vitin 1990, duke u vendosur fillimisht në Gjermani, e pastaj në Linc të Austrisë.

Në mërgim i hyn fushës së artit pamor, ku piktura është prirja e tij. Ai do vazhdojë mësimet tek artistët e njohur austriakë, piktori Erich Ruprecht dhe Mag.art.Judith Goetzloff në Linz. Krahas kësaj, Gazmendi iu rrek punëve në pikturim, në grafikë, ngjyra vaji në kanavace. Piktura me motive nga bukuria e femrës dhe peizazhi janë dominuese në punën e tij artistike./Hazir Mehmeti, Vjenë/albinfo/