Nga Remzije Zekolli – Analistë, kritikë, portale në gjuhën shqipe dhe në gjuhë të huaja, shpeshherë në analiza dhe kritika arti, janë shprehur se piktori shqiptar nga Kosova, Gazmend Freitag ka lindur me talentin e tij krijues. Edhe krijuesit e mëdhenj kanë histori fëmijërie të cilën e ndajnë me publikun. Maestro i pikturës, Gazmend Freitag për pak çaste na kthen në fëmijërinë e tij të gërshetuar plot ngjarje reale dhe të përjetuara. Tani para artdashësve të tij, por edhe më gjerë sjellim një dëshmi, një thesar të llojit të vet, i cili dëshmon talentin e tij qysh nga fëmijëria.
Me pedantëri kishte vendosur numrat në fletët e bardha ku kishte shkruar vjershat. Në atë arkë thesari ruhen edhe vizatimet e tij të para. Në vendlindjen e tij si në çdo fshat të Kosovës shtohej familja e rriteshin fëmijët, ndërtonin shtëpi dhe secili dilte e jetonte fatin e tij. Familja u nda sipas traditës e zakonit të asaj ane, u ndërtuan tri shtëpi të reja. Babai i piktorit u vendos në shtëpinë e re ndërsa shtëpia e vjetër ku kishte lindur ai, i mbeti vëllait të dytë, axhës së piktorit, i cili jetonte me prindër.
Krijuesi i vogël me kujdes i kishte ruajtur librat e tij, të secilës klasë të cilat i kishte ndarë veç e veç në thes najloni dhe i kishte renditur për mrekulli. Në atë arkiv të vetkrijuar, me kujdes ruante atë thesar fëmijëror, libra, fletore, vizatime, literaturë shkollore, mes tjerash romanin „Pse“ të Sterio Spasses i cili ishte i ndaluar të lexohej në atë kohë, indeksin dhe literaturën e fakultetit juridik.
Krijuesi ishte 22 vjeç kur iku në Gjermani. Shtëpinë e vjetër ku ishin gjërat e tij në çati, e kishte shkatërruar axha, nga brenda të katër dhomat, u shndërruan në shtallë të lopëve. Në çati piktori i kishte fshehur gjërat e tij personale. Askujt si ra ndërmend t’i ruante ato materiale. Një pa kujdesi e vogël e tyre i humbi pa gjurmë gjithë atë arkiv krijimesh të piktorit.
Vjeshta e vitit 2003, shënon një moment të veçantë në jetën e tij, rishfaqjen e fletores së poetit të vogël me vjersha që nga viti 1982 i cili në rrugëtimin e tij u lartësua në legjendë të artit pamor botëror./rajonipress/
Legjenda: Gazmend Freitag, Pataqani i Poshtëm, Kosovë, 1982
