Gaxherri: LDK-ja po punon që të dalë subjekti i parë politik, koalicioni me LVV-në është problem

Anëtarja e Lidhjes Demokratike të Kosovës, Besa Gaxherri, ka deklaruar se bashkëpunimi me Lëvizjen Vetëvendosje nuk është në interes të Kosovës, duke theksuar se kjo ka qenë arsyeja pse nuk u arrit koalicioni mes dy partive.

Gaxherri tha se çdo parti që synon të qeverisë si LVV-ja nuk mund të bashkëpunojë me LDK-në.

“Ne si parti e kemi analizuar që bashkëpunimi me VV-në është në dëm të Kosovës. Prandaj, edhe kësaj radhe nuk ka ndodhur koalicioni. Por, natyrisht edhe LVV-ja nuk e ka korrektësinë që të bashkëpunojë me partitë politike ndershëm. Ne e dimë të gjithë se në çfarë forme ka dëshirë që ajo të bashkëpunojë dhe një gjë të tillë nuk mund ta bëjë as ajo e asnjë parti politike me LDK-në”, ka thënë Gaxherri në Tëvë1.

Ajo tha se për zgjedhjet e parakohshme, LDK-ja po punon për të dalë subjekti i parë politik dhe se pastaj, partitë e tjera janë të gatshme të bëjnë koalicion me të.

“Po punojmë që të dalim subjekti i parë politik e pastaj me LDK-në të gjitha partitë në Kosovë janë të gatshme dhe duan të bëjnë koalicion. Me LDK-në nuk ka askush problem, ndërsa të gjitha partitë tjera tërthorazi ato kanë problemet e veta”, ka thënë Gaxherri.

Ajo gjithashtu ka theksuar se LDK-ja ka punuar gjithmonë për të shmangur vijat e kuqe mes partive politike shqiptare në Kosovë, por bashkëpunimi me VV-në, sipas saj, ka mbetur një problem për shkak të sjelljes së saj gjatë qeverisjes dhe jo-qeverisjes së përbashkët.

“LDK-ja ka punuar gjithë jetën që të mos ketë vija të kuqe mes partive politike shqiptare në Kosovës. Fatkeqësisht me LVV-në është problem, sepse LVV-ja për këto kohë sa ka qeverisë – përveç problemeve që kemi pasur ne kur kemi bashkëqeverisur, problemet më të mëdha kanë qenë kur s’kemi qeverisur bashkë”, ka përfunduar Gaxherri.