Gashi, në mesin e yjeve në Amerikë

Sipas Fox Sport, Shkëlzen Gashi është në mesin e 50 lojtarëve me më influencë në Major League Soccer. Shkëlzen Gashi ka pasur një sezon të shkëlqyer me Colorado Rapids në Amerikë. Këtë e konfirmojnë jo vetëm statistikat, por gjithashtu dhe një nga rrjetet më të mëdha mediatike në këtë vend, Fox Sport.

Kjo e fundit e ka përfshirë sulmuesin kuqezi në listën e 50 lojtarëve me më influencë në Major League Soccer. Gashi është renditur i 19-ti në këtë klasifikim të veçantë.

“Finalizimi i Gashit i mrekullueshëm ndaj L.A Galaxy në play off nuk do të harrohet lehtë, dhe ky nuk ishte i vetmi gol i rëndësishëm i shënuar prej tij në këtë sezon. Gashi është shfaqur shpesh në momente të rëndësishme dhe pse mund të kishte qenë pak më shumë pragmatist përpara portë”, thuhet në përshkrimin e Fox Sport për Gashin.

Sipas Fox sports, Gashi mund të renditej më sipër nëse do të kishte realizuar më tepër gola për skuadrën e Colorados, por gjithsesi mbetet një prej yjeve të skuadrës, në një kampionat ku emrat e mëdhenj nuk mungojnë.

Sulmuesi shqiptar është renditur vetëm një pozicion më lartë se Steven Gerrard, ndërsa ka lënë pas emra si Didier Drogba, Clint Dempsey apo Nelson Valdez. /Express/