Gashi flet për golin më të mirë në karrierë, ushqimin dhe sportet tjera

Shkëlzen Gashi është përgjigjur nga pyetjet e tifozëve që janë bërë në adresë të ‘Twitterit’ të skuadrës së tij, Colorado Rapids.

Sulmuesi kuqezi ka shuar kureshtjen e fansave të skuadrës amerikane duke iu dhënë informacione për karrierën futbollistike, por edhe rreth jetës private.

Edhe pse vetë është futbollist, Gashi i tregoi fansave se i pëlqen shumë tenisi dhe basketbolli, sporte që do t’i ndjekë më shumë gjatë olimpiadës së Rios, interesante ishte përgjigjja e Gashit për pyetjen se çfarë profesioni do të kishte zgjedhur nëse nuk do të ishte bërë futbollist, ku ai theksoi se ndoshta do të ishte diplomuar në jurisprudencë ose do të bëhej pilot.

Çdo futbollist ka preferencat e tij për sa u përket kolegëve që luajnë me skuadrat më të mira në botë, ndërsa, Gashi, nëse do të kishte pasur mundësinë e zgjedhjes, do të preferonte të luante përkrah Ronaldos së Brazilit.

Ushqimi i preferuar i Gashit është flija tradicionale shqiptare, teka goli më i bukur në karrierë veçohet finalizimin në fitoren 2-1 më Armeninë në Elbasan Arena, shumë i rëndësishëm për kualifikimin e Shqipërisë në finalet e Evropianit.

Ndërsa, nga eksperienca e deritanishme në MLS, Gashi veçon si atmosferën më të bukur në futbollin amerikan atë që krijohet nga impianti i skuadrës së New York Cityt, por sigurisht stadiumi i Colorado Rapids mbetet unik për të. /Telegrafi/