Gashi dëshiron të bëhet super baba

Ardian Gashi dëshiron të jetë një super baba dhe t’i përkushtohet më shumë familjes. Por, mesfushori kosovar nuk ka kohë të mjaftueshme të qëndrojë për shkak të angazhimeve të shumta që ka me ekipin e Helsingborgut.

Përpos ndeshjeve në kampionatin suedez, ky ekip është i angazhuar edhe në garat evropiane, ku garon në Europa League. Të enjten Helsingborgu do t’i masë forcat me skuadrën spanjolle Levante.

“Është e vështirë të relaksohem. Familja është jashtëzakonisht e rëndësishme, por mund të gjej arsye për të qëndruar larg pas angazhimeve që kam. Nuk është e lehtë, sepse dua të jem një super baba. Nuk ka gjë më të bukur se momenti kur kthehesh në shtëpi dhe takon gruan me dy fëmijët e vegjël, që lumturohen kur e shohin babanë të rikthehet në shtëpi”, ka thënë fotbolldirekt.se.

Ai thotë se gjërat vështirësohen kur nuk shkojnë punët mirë në futboll. Gashi shpreson që të arrijnë rezultatet pozitive për Helsingborgun, si në Allsvenskan, ashtu edhe në Europa League.