Galatasaray do të takohet me Norwichin, gjiganti turk dëshiron blerjen e Rashicës

Milot Rashica ka filluar të lë gjurmë në klubin e tij të ri Galatasaray.

Sulmuesi nga Kosova iu bashkua skuadrës turke më 8 shtator nga Norwich City si huazim për një edicion.

Por pas një fillimi të vështirë, Rashica ka ardhur në shprehje dhe ka zënë vendin e titullarit.

Mediat turke kanë raportuar se trajneri i Galatasarayt, Okan Buruk ka mbetur shumë i kënaqur nga paraqitja e fundit e Rashicës, si në Kupë ashtu edhe në kampionat.

26-vjeçari realizoi dy gola në Kupën e Turqisë ndaj Kastamonuspor, derisa e nisi si titullar edhe sfidën ndaj Fatih Karagumruk të fituar 2-0 nga Galatasary.

Ndaj skuadrës së Ibrahim Dresevic, Rashica luajti nga minuta e parë dhe ishte ndër lojtarët më të mirë në ndeshje duke asistuar në golin e parë, derisa krijoi edhe disa raste të mira si për vete ashtu edhe për bashkëlojtarët e tij.

Gjithnjë sipas asaj që raportojnë mediat në Turqi, drejtuesit e Galatasaray do të takohen me ata të Norwichit për të diskutuar të ardhmen e Rashicës.

Gjiganti turk është i gatshëm ta blej përfundimisht kartonin e Rashicës dhe në takim me drejtuesit e klubit anglez do të diskutohet për çmimin e kosovarit.

Vlera aktuale e Rashicës në tregun e transferimeve është shtatë milionë euro. /Telegrafi/

Shpërndaje.
© RAJONIPRESS