FSK-ja në gjendje gatishmërie të ndihmojë në masat për parandalimin e pandemisë COVID-19

Në kuadër të Forcës së Sigurisë së Kosovës (FSK) është vënë në gjendje gatishmërie Batalioni i Mjekësisë.

Ministri i Shëndetësisë, Armend Zemaj, ka takuar sot gjeneralin Rrahman Rama, me të cilin kanë biseduar rreth ndihmës dhe gatishmërisë së FSK-së për të ndihmuar në masat për parandalimin e pandemisë COVID-19.

Në një postim të ministrit Zemaj thuhet se gjenerali Rama sqaroi se FSK-ja ka kapacitete mjekësore e logjistike për t’u përballur me çfarëdo situate. “Në kuadër të Forcës së Sigurisë së Kosovës është vënë në gjendje gatishmërie Batalioni i Mjekësisë, që mund të vihet plotësisht në shërbim të qytetarëve të Kosovës. E falënderova gjeneral Ramën për bashkëpunimin e shkëlqyer, gatishmërinë e tij dhe FSK-së për ndihmën që po ofrohet në betejën kundër virusit”, ka thënë Zemaj.

Zemaj tha se Ministria e Shëndetësisë do të përkrahë FSK-në në fuqizimin e personelit shëndetësor dhe me pajisje mjekësore. “Me ushtarët tanë vajzat e djemtë FSK-së dhe së bashku me të gjithë qytetarët do të triumfojmë në luftën me pandeminë”, ka thënë ai. /Zëri