Fondacioni Kosovë – Luksemburg mundësi punësimi e zgjerim biznesi

Viti – Fondacioni Kosovë – Luksemburg fton qytetarët vitias që të aplikojnë për bizneset fillestare dhe atyre ekzistuese në projektin e saj që do implementohet në Viti.

Me qëllim të mbështetjes financiare dhe bashkëfinancimin e bizneseve fillestare dhe të atyre ekzistuese të cilat janë jo më të vjetra se 3 vjet është mbajtur sot sesioni informues me qytetarë të komunës së Vitisë, të cilët mund të aplikojnë në projektin “Gjenerimi i të ardhurave” që financohet nga Qeveria e Luksemburgut ndërkaq që implementohet në Kosovë nga Fondacioni Kosovë-Luksemburg.

Ndërkaq edhe komuna e Vitisë është përfituese e këtij projekti që për qëllim ka hapjen e bizneseve apo edhe zgjerimin e atyre ekzistuese.

Veton Ademi, Drejtor i Bujqësisë, Pylltarisë dhe Zhvillimit Rural falënderoj Qeverinë e Luksemburgut për mbështetjen që po ja jep komunës së Vitisë.

Ai ndër tjerash tha se kjo komunë ka nënshkruar më parë një marrëveshje për bashkëpunim me Fondacionin Kosovë-Luksemburg që financohet nga Qeveria e Luksemburgut duke potencuar se në kuadër të projekteve të parapara sot po mbahet ky sesion informues që ka për qëllim kryesor hapjen e bizneseve të reja apo edhe zgjerimin e atyre ekzistuese.

Ndërkaq gjatë këtij takimi të pranishmit përveç se janë njoftuar me projektin në fjalë janë njohur edhe për së afërmi me fazat e aplikimit, kriteret për aplikim dhe atyre përjashtuese etj.

Kurse sipas udhëzuesit të publikuar të drejtën për aplikim për biznese fillestare kanë banorët e përhershëm të komunës së Vitisë me dokument të vlefshëm të Republikës së Kosovës, të jenë të moshës prej 18-65 vjeç.

Gjithashtu aplikuesit duhet të jenë të gatshëm për pjesëmarrje me bashkëfinancim në investim dhe atë prej 25%. Ndërkaq për ndryshe aplikuesit duhet të kenë edhe përvojë të caktuar në fushën në të cilën kërkohet përkrahja financiare dhe teknike.

Ndërkaq për bizneset ekzistuese kriterit e aplikimit janë pothuajse të njëjta përveç se kërkohet që aplikuesi të jetë i gatshëm të punësoj së paku një punëtor të ri, të kenë biznesin e tyre të regjistruar dhe të jetë më i ri se 3 vjet. Përndryshe e drejta për aplikim është e hapur deri me 18 maj të këtij viti./rajonipress/