Flora Brovina i përgjigjet Ambasadores Jacobson: S’ka seancë pa marrëveshje

Flora Brovina, Kryesuese e seancës konstitutive të Kuvendit, ka thënë se s’do të ketë vazhdim të punës në Parlament pa një marrëveshje politike. Ajo beson se javën e ardhshme do të ketë lëvizje në qartësim të situatës politike.

Mosvazhdimi i seancës së Kuvendit ka irrituar edhe Flora Brovinën, kryesuesen e Kuvendit, njëherësh deputeten më të vjetër.

Brovina në një prononcim për “Zërin” ka përsëritur se pa marrëveshje të liderëve të partive, duke përfshirë këtu edhe shefin e saj, Hashim Thaçin, nuk do të ketë seancë.

“Është tepruar që nuk po vazhdon seanca. Nuk ndihem mirë që s’po kam mundësi ta thërras. Po shihet atmosfera e liderëve që nuk po merren vesh mes vete, dhe pa një marrëveshje mes tyre nuk po ka zgjidhje”, ka thënë ajo.

Ndërsa, deklarata e ambasadores së SHBA-së në Kosovë, Tracey Ann Jacobsson për thirrje sa më shpejt të vazhdimit të seancës konstituive, për Brovinën, është apel i pranueshëm.

Por, kryesuesja e Kuvendit shpreson që javën e ardhshme do të ketë lëvizje të mira.

“Besoj që javën e ardhshme do të qetësohet kjo atmosferë e këtyre debateve të stërzgjatura”, ka thënë në fund ajo. /Zëri/