Fjalët e Mirlind Dakut pas ndeshjes: Goli, festa dhe dedikimi

Mirlind Daku ka heshtur kritikat ndaj tij me një gol ndaj Polonisë, ku sulmuesi shënoi në stilin e një sulmuesi të vërtetë.

Duke folur pas ndeshjes, sulmuesi tha se ishte i bindur që do të gjente golin ndaj Polonisë, teksa pati edhe një dedikim special…

“Ka zot dhe e nderon njeriun e drejtë. Ato lot ishin vetëm për debutimin emocionues dhe jo për atë pasim të gabuar. Sot zoti më shpërbleu dhe arrita të shënoj atë gol”.

“Me golin që shënova, çdo e keqe që kisha brenda, doli jashtë. E kam pasur bindje që do të shënoja gol në Shqipëri, ndaj Polonisë dhe ia dola. Me këtë gol, më duket sikur largova një peshë 100-kilogramëshe nga vetja”, ka thënë Daku.

Ai ka thënë se më mirë që nuk shënoi në ndeshjen e parë, pasi një gol në Tiranën para tifozëve ka peshën ndryshe.

“Më mirë që nuk shënova në ndeshjen e parë, por në këtë takim, para tifozerisë së mrekullueshme shqiptare. Të gjithë më kanë mbështetur shumë dhe jam i lumtur që ua shpërbleva me këtë gol. Ndoshta u bëra nervozë të gjithëve me atë pasim në ndeshjen e parë, por besoj që e shpërbleva në mënyrën më të mirë të mundshme”, deklaroi Daku.

Në fundi ai golin ia dedikoi familjes dhe dëshmorëve që dhanë jetë në luftën e Kosovës.

“Ia dedikoj familjes time, që më ka përkrahur gjithmonë, por edhe gjithë dëshmorëve në Kosovë, që kanë dhënë gjithçka për atdheun dhe kanë kontribuuar që ne të mblidhemi nga të gjithë trevat dhe të luajmë me këtë fanellë”, ka thënë Daku.

Shqipëria pas kësaj fitoreje aktualisht ka 10 pikë, me tri fitore, një barazim dhe një humbje dhe është lider i grupit. /Telegrafi/