Fitore e shpresës e Vllaznisë së Pozheranit

Gjilan – Skuadra e Vllaznisë dhe e Flamurtarit kanë hapur javën e 18-të, të Superligës së Kosovës në futboll, e cila javë është e fundit e pjesës vjeshtore të futbollit Kosovar.

Në stadiumin e qytetit në praninë e pak shikuesve, nëpër fushë të mbuluar me ujë, futbollistët e Vllaznisë në derbin e skuadrave të fundit të tabelës kanë mposhtur “kuq e zinjët” e Flamurtarit me rezultat 2-0.

Kjo fitore futbollistët e Vllaznisë i bën të mbajnë shpresë në stinorin pranveror për rezultate pozitive.

Gjatë 90 minutave, skuadra e Vllaznisë ishte superiore ndaj Flamurtarit duke kërkuar fitore.

Që nga fillimi i ndeshjes, futbollistët e Vllaznisë filluan të atakonin portën e portierit, Vullnet Zhushit.

Në minutën e 19-të, Festim Krasniqi nga 17 metra gjuan në mënyrë mjeshtërore edhe pse portieri Zhushi bëri përpjekje topi gjen rrjetën e Flamurtarit, ishte një gëzim i madh tek futbollistët e Vllaznisë.

Dhjetë minuta më vonë Krasniqi gjuan nga 30 metra furishëm, portieri Zhushi mbron duke goditur shtyllën pingule të tij.

Musafirët të vetmin rast e patën në minutën e 31-të, kur sulmuesi Ardit Jupa gjuan me kokë afër shtyllës pingule të Jasir Bajramit.

Edhe në pjesën e dytë, futbollistët e Vllaznisë me lojë të mençur arritën të dominojnë në fushë, ndërsa golin e nokautit e shënon mesfushori Maliq Behluli, duke i dhënë shpresë se në pranverë futbollistet e Vllaznisë do të riorganizohen më mirë.

Futbollistët e Vllaznisë nga 18 javë kanë shënuar vetëm dy fitore dhe dy barazime, duke shënuar në konton e tyre 8 pikë.

Nëpër fushë të rrëshqitshme, arbitri i kësaj ndeshje ishte Selim Isufi nga Mitrovica./rajonipress/