FIFA fton FFK-në për takim, vendimi më 13 janar

Presidenti i FIFA-s, Sepp Blatter i ka dërguar ftesë zyrtare delegacionit të Federatës së Futbollit të Kosovës, të kryesuar nga Fadil Vokrri, për t’u takuar për herë të dytë me krerët e Federatës së Futbollit të Serbisë (FSS).

Ky takim, i cili do të ndërmjetësohet nga vet Blatter, do të mbahet më 10 janar në selinë e FIFA-s në Zvicrës. Në takim do të diskutohet sërish rreth kërkesës së Kosovës për të zhvilluar ndeshje miqësore ndërkombëtare.

“Ftesa zyrtare ka arritur në FFK. Takimi me palën serbe do të jetë thuajse vetëm formal, sepse s’kemi çka të diskutojmë. Ndërsa, më 13 janar, vendimin rreth kërkesës sonë do ta merr Komisioni për Çështje Urgjente i FIFA-s. Kemi sinjale se vendimi do të jetë pozitiv për ne. Ai vendim do të jetë si dhuratë për Kosovën nga FIFA për festat e fund-vitit”, tha për Arenën nënkryetari i FFK-së, Agim Ademi.

Sipas tij, prej 13 janarit Kosovës do t’i lejohet të luajë miqësore ndërkombëtare me të gjitha klubet dhe përfaqësueset e saj, edhe atë pa kurrfarë kushtesh.