Fëmijët janë të mëdhenj
RajoniPress
06:54, 10 Shtator, 2017
Poezi nga Avdush Canaj
Fëmijët janë të mëdhenj,
sa herë duan i prekin retë!
Diellin e zbresin në dritare
veshur me xhaketë!
Të mëdhënj janë fëmijët,
buzëqeshja e tyre e mund erën!
Në pentagram të lumturisë
pëllumbave ia hapin derën!
Në shpinë të ditës katrithen,
ngadalsojnë akrepat e orës!
Djersët ia fshijnë lojës puhishëm
me pëllëmbë të dorës!
Ato duar prej rrezësh
vend s`i lënë mërisë!
Për nënat mbjellin lule
me aromë të dashurisë!
Janë të mëdhenj fëmijët,
thotë ëndrra e barit me vesë,
puthje e përqafime
shpërndajnë në çdo adresë!
11 mars 217
