Fejzullahu çmallet dhe mërzitet nga vizita në Kosovë

Prishtinë – Sulmuesi kosovar i përfaqësueses së Suedisë, Erton Fejzullahu, kishte 11 vite që nuk kishte shkelur tokën e Kosovës. Por kur ai e shkeli pa shumë gjëra që nuk do t’ia dëshironte askujt. Ai pas gjithë këtyre viteve për një javë qëndroi në Kosovë, por u kthye në Suedi i mërzitur.

“U ktheva sërish në Suedi pas një jave të kaluar në Kosovë. Nuk isha në Kosovë qe 11 vite. Ka qenë kënaqësi që takova gjyshen time dhe të afërmit e mi që nuk më kishin parë për një kohë të gjatë”, ka shkruar Fejzullahu në rrjetin social “facebook” të premten.

Fejzullahu, 25-vjeçar, me origjinë nga Mitrovica, aktualisht është futbollist i skuadrës suedeze, Djurgarden. Me ekipin suedez ai ka kontratë deri në qershor të vitit 2016.

Një ndeshje të zhvilluar ka edhe me përfaqësuesen e Suedisë, derisa për ekipin Shpresa (U21) të Suedisë në shtatë ndeshje ka shënuar shtatë gola.

“Pak gjëra kanë ndryshuar që prej luftës, por ende varfëria është tepër e madhe. Kjo më ka bërë të zgjohem nga gjumi. Jam shumë i lumtur që jam rritur në Suedi dhe kam pasur mundësi për të përparuar dhe realizoj ëndrrat e mia”, ka shtuar Fejzullahu.

Ai këtë edicion me fanellën e ekipit elitar të Suedisë ka shënuar shtatë gola dhe ka asistuar tri herë në 27 ndeshje.

Fejzullahu më herët ka luajtur edhe për skuadrën NEC Nijmegen, Mjallby, Randers e Kopenhagen.

Ai në fund të komentit ka shkruar se do të dëshironte që shokët e tij në Kosovë t’i kishin mundësitë që ai i ka në Suedi.

“Do të doja që gjithkush t’i kishte pasur mundësitë e mia. Gjithçka tek unë ka qenë e përkryer dhe nuk mund të ankohem për asgjë. E di që shokët e mi kanë probleme dhe brenga të ndryshme. Mirëpo duhet të kënaqemi me këtë që kemi, pasi ka të tjerë që i kanë kushtet edhe më të këqija”, ka thënë Fejzullahu.