Fehri Qerimi me shok akuzohet për cenim të drejtave të punësimit

Gjilan – Në Gjykatën Themelore në Gjilan të enjten është dashur të mbahet seanca e parë gjyqësore kundër drejtorit të arsimit në Viti, Fehri Qerimi, Feti Sahiti dhe Fehmi Neziri të dyshuari për veprat penale”cenimi i të drejtave të punësimit apo papunësisë dhe “shpërdorimi i pozitës zyrtare apo i autorizimit”. Gjykimi është shtyrë për shkak se gjykatësja Emine Salihu ndodhet në pushim mjekësor.

Në Gjykatën Themelore të Gjilanit është shtyrë gjykimi kundër drejtorit të arsimit në Viti, Fehri Qerimi, Feti Sahiti dhe Fehmi Neziri të akuzuar nga Prokuroria Themelore e Gjilanit për veprat penale “cenimi i të drejtave të punësimit apo papunësisë dhe “shpërdorimi i pozitës zyrtare apo i autorizimit”, raporton rajonipress.

Gjykimi është shtyrë për kohë të pacaktuar për shkak të mos prezencës së trupit gjykues. Gjykatësja, Emine Salihu kryetare e trupit tha se ndodhet në pushim mjekësor dhe gjykimi është shtyrë për një afat të pacaktuar.

Ndryshe aktakuza e ngritur nga prokurori Shqipdon Fazliu e ngarkon Fehri Qerimin se në cilësinë e drejtorit të arsimit në Viti dhe si kryesues i panelit për intervistim dhe dy të pandehurit tjerë si anëtarë të panelit për intervistim ia kanë mohuar të dëmtuarit Ramadan Ramadani të drejtën në punësim të lirë në kushte të njëjta.

Sipas aktakuzës tre të pandehurit i kanë shkelur kriteret për poentim të kandidatëve duke shkaktuar veprime të kundërligjshme.

Ndërkaq, Fehri Qerimi tha për rajonipress se aktakuza është e paqëndrueshme dhe nuk bazohet në dëshmitë e ofruara dhe të argumentuara nga drejtoria e arsimit.”Vërtet s`ka asgjë diskutabile në veprimet tona. Gjithçka që kemi bëtë e kemi bërë në mënyrë profesionale dhe ligjore” tha shkurt Qerimi./rajonipress/