Federica Mogherini kërkon nga Ekipi negociator heqjen e taksës

Në takimin që sot u zhvillua në Bruksel ndërmjet Ekipit negociator të Kosovës dhe Federica Mogherinit, kjo e fundit përsëri kërkoi heqjen e taksës.

Një gjë të tillë e ka bërë të ditur Zyra e përfaqësueses së BE-së nëpërmjet një komunikate për media.

“Ky takim ishte për t’u njoftuar me përfaqësuesit e Kosovës në dialogun e Brukselit. Në këtë kontekst, përfaqësuesja e lartë ka përsëritur edhe një herë nevojën urgjente për të hequr vendimin për taksën, që është vendosur nga Qeveria e Republikës së Kosovës vitin e kaluar”, thuhet në komunikatën e zyrës së Mogherinit.

Mogherini gjithashtu ka kërkuar që të respektohen marrëveshjet që dy shtetet i kanë arritur në Bruksel.

Sipas saj, një marrëveshje e paqes do të krijonte edhe një klimë të fqinjësisë së mirë në Ballkan.

“Duhet të krijohet një klimë që i kontribuon fqinjësisë së mirë, ku marrëveshjet e arritura në të kaluarën duhet të respektohen e implementohen dhe veprimet dhe deklaratat që nuk janë në pajtim me interesin e përgjithshëm dhe objektivat strategjikë për rajonin duhet të shmangen”, thuhet në njoftim.

Pas takimit me Mogherinin, u prononcuan edhe dy kryesuesit e ekipit të dialogut, Fatmir Limaj dhe Shpend Ahmeti.

Të dy u shprehën se BE-ja është e interesuar për intensifikim të dialogut dhe arritjen e një marrëveshje finale. /Telegrafi/