Federatat e hendbollit dërgojnë në IOC rastin e Kosovës

Prishtinë – Federata Ndërkombëtare e Hendbollit (IHF) dhe ajo evropiane (EHF) do t’i drejtohen Komitetit Olimpik Ndërkombëtar (IOC) lidhur me rastin e Kosovës. Nga IOC-ja dy asociacionet e hendbollit do të kërkojnë sqarime të mëtejme për Kosovën. Kështu është vendosur në takimin që IHF-ja e EHF-ja e zhvilluan në mesjavë në zyrat e Federatës Evropiane.

“IHF-ja dhe EHF-ja janë pajtuar që së bashku t’i qasen IOC-së për sqarim të mëtutjeshëm për statusin e Kosovës”, thuhet në një njoftim të EHF-së, raporton Koha Ditore.

Federata e Hendbollit të Kosovës nga viti 2004 është pranuar si anëtare me të drejta të kufizuara në EHF. Më vonë me status të njëjtë u pranua edhe në IHF. Skuadrat kosovare paraqiten rregullisht në gara evropiane, por Kosovës nuk i lejohet prezantimi në nivel të përfaqësueseve.

Kryetari i FHK-së, Mexhid Devaja, thotë se dy federatat ndërkombëtare janë të interesuara që të pranojnë Kosovën me të drejta të plota. Sipas tij, EHF-ja e IHF-ja në takim me IOC-në do të kërkojnë zgjidhje për rastin e Kosovës. Devaja javën e kaluar ishte për vizitë në EHF.

“Dy vite pas pranimit tonë, federatat ndërkombëtare të sporteve të mëdha si futbolli, basketbolli, hendbolli e volejbolli patën një takim ku vendosën që Kosovën ta pranojnë në të njëjtën kohë. Kjo ka bllokuar pranimin tonë. Tani asociacionet e hendbollit duan të heqin dorë nga kjo marrëveshje pasi e dinë se duhet të na pranojnë. Ndikim në këtë ka edhe presioni ynë i vazhdueshëm. Tani EHF-ja e IHF-ja do të mbajnë një takim me drejtuesit e Komitetit Olimpik Ndërkombëtar ku do të kërkohet një zgjidhje për Kosovën”, ka thënë Devaja.

IOC-ja deri më tani nuk ka treguar gatishmëri për të thyer izolimin e sportit kosovar. Ndër të tjera IOC-ja nuk ia mundësoi xhudistes Majlinda Kelmendi që të garonte për Kosovën apo si sportiste e pavarur në Lojërat Olimpike “Londra 2012”. (koha)