FC Kosova në ndeshje vëllazërore mposht Dardanën

Gjilan – Në stadiumin “Agush Isufi” në qytetin e Dardanës, skuadra vendëse Dardana anëtare e Ligës së ll grupi B, ishte nikoqire e mysafireve FC Kosova nga Zurich.

Shkallët e stadiumit “Agush isufi”, ishin përplot me shikues duke respektuar dy skuadrat në fushën e blertë.

Para ndeshjes kryesia e FC Kosovës, vendësve ua dhuroi nga një palë fanela sportive, po të njëjtin respekt e kishin edhe vendësit të cilët mysafirët i nderuan me një mirënjohje nga skuadra e Dardanës.

Rezultati i kësaj ndeshje ishte në plan të dytë, ndërsa përgjatë 90 minutave dy skuadrat treguan futboll cilësor.

Edhe pse në temperatura tropikale nuk munguan golat, kësaj radhe fitorja me meritë ju takoi mysafireve nga Zurich, të cilët mposhtën Dardanasit me rezultat 4-3.

Trajnerët e FC Kosovës, Adnan Ismajli dhe Majlush Berisha, pas kësaj ndeshje deklaruan.
“Jemi shumë të nderuar dhe i falënderohemi skuadrës së Dardanës për mikpritjen që na kanë bërë, ishte një lojë vëllazërore rezultati ishte i dorës së dytë, ndërsa një falënderim i posaçëm ju shkon shikuesve që në këto temperatura tropikale na përkrahën duke e ndier ne vetën si në shtëpinë tonë”.

Trajneri i Dardanës Enver Sërmaxhaj deklaroi.
“Edhe pse kampionati ka përfunduar qe një kohë të gjatë, arritëm t`i nderoj vëllezërit tanë nga Zurich, jemi shumë të lumtur që pikërisht ndeshjet e tyre që po i zhvillojnë në Kosovë na kanë përzgjedhur skuadrën tonë ndërsa ne ju dëshirojmë shumë suksese ne të ardhmen.

FC Kosova nesër ndeshjen miqësore e zhvillon me Bashkimin e Koretinit./rajonipress/