Faton Maloku pas 9 muajve i rikthehet fushës së futbollit

Njëri ndër portierët më të mirë në futbollin e Kosovës, Faton Maloku gjatë do ta kujton ndeshjen kundër Trepcës’89, e zhvilluar para 9 muajve, pasi në këtë takim kishte këputur ligamentin ACL, lëndim i cili e largoj nga fusha e futbollit për një kohë të gjatë por edhe ia rrezikoi komplet karrierën e tij.

Maloku iu është bashkangjitur “bardhekaltërve” të Dritës në vitin 2019.

Ai është shtyllë kryesore në skuadër, duke mbrojtur më tepër se 100 ndeshje në fanellën e Dritës, ku poashtu kishte marrë edhe ftesë për të mbrojtur ngjyrat e Kombëtares së Kosovës.

Pas lëndimit në Prill të vitit të kaluar, Maloku ishte operuar në Shkup të Maqedonisë së Veriut, ku ju deshtë një kohë e gjatë të rehabilitohet, dhe në mënyrë triumfale të gjitha këto probleme i tejkaloi me shumë sukses duke ju rikthyer klubit dhe shokëve të tij.

“Gardiani” i Dritës, Maloku, tani këtë lëndim e ka të harruar dhe është i gatshëm t’ju rikthehet shtyllave të Dritës.

“Ka qenë një lëndim shumë serioz që më ka larguar një kohë të gjatë nga shokët e nga klubi, por tani ky lëndim i përket të kaluarës dhe tani jam i përgatitur si asnjëherë më pare. Pres ta fitoj besimin e trajnerit Zekirja Ramadanit dhe të jap kontributin tim drejt sukseseve të klubit pasi na presin sfida të mëdha si për titull të kampionit poashtu edhe për Kupë të Kosovës. Dua t`i falënderoj të gjithë ata që patën besim dhe më dhanë përkrahje në këto momente të vështira, poashtu një falënderim i veçantë shkon për krerët e klubit të cilët në asnjë moment nuk më lanë vetëm”.
Me rikthimin triumfal të Faton Malokut, FC Drita do të jetë edhe më e fortë për skuadrat rivale.