Fatmir Selimi del me librin e katërtë kushtuar shqiptarëve të Turqisë

Gjilan – Fatmir Selimi me profesion mjek ka nxjerrë në dritë veprën e katërtë të titulluar: “Me shqiptarët e Turqisë”, ku në detaje përshkruan vizitat që ka përjetuar në vendet ku jetojnë shqiptarët, ruajnë traditat dhe mendojnë gjithmonë për Kosovën.

Fatmir Selimi po prezantohet me veprën e tij të katërtë kushtuar shqiptarëve të Turqisë. I pasionuar pas historisë së familjeve shqiptare që ndodhen të shkapërderdhura në Turqi, Selimi ka ofruar shumë dëshmi, fakte, materiale e dokumente që argumentojnë vende të shumta të banuara me shqiptarë.

Libri i titulluar: “Me shqiptarët e Turqisë” ilustrohet me foto të shumta, takime të përzemërta, vizita në familje e institucione, ku udhëheqin edhe shqiptarët.

Fatmir Selimi thotë se edhe ky libër i kushtohet diasporës më të organizuar shqiptare duke filluar nga Bursa, ku ka një koncentrim të madh të shqiptarëve.

Selimi është i bindur se do të vazhdoj edhe më tutje të punojë dhe të njoh më mirë shqiptarët e Turqisë, derisa kërkon nga institucionet kosovare që t`i kushtojnë më shumë kujdes e vëmendje integrimit të shqiptarëve në Turqi./rajonipress/