Fatmir Mehmeti – Nderi i Qytetit

Gjilan – Nderimi dhe respektimi i veprimtarëve të çështjes kombëtare dhe luftëtarëve të lirisë është vlerësim për të kaluarën e lavdishme të popullit tonë dhe frymëzim për brezat e ardhshëm ka shkruar Ejup Maqedonci.

“Sot ju bashkova kryetarit të Komunës së Gjilanit, Alban Hysenit dhe përfaqësuesve të Organizatës së Veteranëve të Luftës në nderimin e bacit Fatmir me titullin “Nderi i Qytetit”, ka shkruar Maqedonci.

Kurse Alban Hyseni ka shkruar:

Sot, së bashku me Ministrin e Mbrojtjes z. Ejup Maqedonci, deputeten Arijeta Rexhepi, bashkëpunëtorë të shumtë dhe përfaqësues të Organizatës së Veteranëve të Luftës, patëm nderin të vizitojmë komandantin e shquar të Ushtrisë Çlirimtare të Kosovës, z. Fatmir Mehmeti.
Baca Fatmir përfaqëson idealin më të lartë të atdhedashurisë dhe sakrificës.

Në periudhën e luftës, ai u kthye nga Gjermania për t’iu bashkuar radhëve të UÇK-së, duke dhënë shembullin më të mirë të përkushtimit ndaj vendit. Krah tij, në këtë rrugë të shenjtë, u bashkua edhe vajza e tij, sot kolegia jonë, Shqipe Mehmeti – Selimi.

Për kontributin e jashtëzakonshëm dhe figurën e tij të ndritur, e nderuam me titullin “Nderi i Qytetit”, si shenjë respekti dhe mirënjohjeje të përjetshme.