Fatmir Limaj për 100 vjetor “Qytetar nderi i Vlorës”

Deputeti i Kuvendit të Kosovës dhe një prej eksponentëve kryesorë të UÇK-së, Fatmir Limajt, iu është dorëzuar sot zyrtarisht titulli qytetar nderi i Vlorës. Limaj nderohet nga qyteti i Vlorës në vigjilje të 28 Nëntorit, i cili shënon edhe 100 vjetorin e shpalljes së pavarësisë së Shqipërisë.

Kryetari i Bashkisë së Vlorës, Shpërim Gjika me këtë rast e ka vlerësuar lartë personalitetin e Fatmir Limajt. Kryetari i Vlorës, Gjika ka vlerësuar kontributin personal të Limajt dhënë gjatë të luftës dhe përpjekjeve të popullit të Kosovës për liri e pavarësi. Ai ka thënë se Vlora ndihet krenare se që nga sot e ka Fatmil Limajn qytetar nderi të saj.

“Motivacioni që shoqëron titullin është: Fatmir Limaj si figurë – simbol i përpjekjeve të popullit të Kosovës për pavarësi, simbol i heroizmit, shpirtit të lirë, demokratik e intelektual të popullit kosovar dhe një faktor i rëndësishëm në zhvillimet politike e diplomatike për finalizimin e statusit të Kosovës me shpalljen e Pavarësisë dhe njohjen ndërkombëtare të saj”, ka thënë Gjika, transmeton RTK.

Nga ana tjetër, deputeti Fatmir Limaj, ka falënderuar të gjithë ata që e kanë respektuar dhe kanë dhënë kontribut për të nderuar atë dhe luftën e shenjtë të UÇK-së. Ai ka thënë se ndihet krenar që është qytetar nderi i Vlorës.

“Jam krenar për nderin që po ma bënë në këtë muajt të rëndësishëm për popullin shqiptarë. Jam i nderuar që jam qytetar i Vlorës”, ka thënë Limaj. Ai ka uruar gjithë popullin shqiptarë për 100 vjetorin e shtetit shqiptarë, duke thënë se tashmë populli shqiptarë kudo që është i gëzohet të arriturave njëshekullore.