Fatmir Limaj dëshiron të bëhet avokat

Një prej figurave më me ndikim të politikës në dekadën e fundit, i cili që nga paslufta është përballur me së paku katër procese gjyqësore, i mbrojtur nga avokatë vendorë e ndërkombëtarë, synon ta bëhet vetë në të ardhmen.

Fatmir Limaj ka kaluar pjesën me shkrim të provimit të jurispundencës, që ia mundëson atij të drejtën të ushtrojë profesionin e avokatit, raporton sot Gazeta Jeta në Kosovë.

Lista me emrat e kandidatëve që kanë kaluar provimin e parë me shkrim është publikuar më 21 shkurt në faqen zyrtare të Ministrisë së Drejtësisë.

Deputeti Limaj është renditur si i gjashti në këtë listë, ku shënon “Fatmir Limaj nga Malisheva”, dhe ka kod identifikues numër 77.

Limaj mund të licensohet në Odën e Avokatëve dhe të përfaqësojë palë në gjykatë nëse e kalon edhe provimim me gojë i cili do të organizohet më 1 mars. /Gazeta JnK/