Farsa e Feridit

Nga Imer Mushkolaj – Pavarësisht se ka dështuar gjatë kohës sa ka qenë ministër i Shëndetësisë dhe nuk e ka realizuar asnjë premtim elektoral, Ferid Agani ka zënë vend sërish në kabinetin e Isa Mustafës. Në krye të Ministrisë së Mjedisit, ai nuk po i zbaton vendimet e pararadhësit të tij, ndërkohë që po i promovon si të reja masat ligjore ekzistuese. Farsë e vërtetë. Ai vazhdon të shesë moral – “në emër të zotit – me drejtësi”

Po të realizoheshin premtimet e bëra nga ai, kosovarët tashmë do të kishin sigurimin shëndetësor, pensionistët barna falas, vajzat që bartin shami do të shkonin pa probleme në shkollë, ndërkaq mësimi i fesë do të ishte pjesë e planprogrameve shkollore. Por, Ferid Agani, që tash mban postin e ministrit të Mjedisit dhe Planifikimit Hapësinor, nuk e ka përmbushur asnjë nga këto premtime. Për më tepër, në pozitën që mban tash, ai nuk po zbaton vendimet e paraardhësit të tij, ndërkohë që po promovon kinse si të reja udhëzime administrative që janë në fuqi tash sa kohë.

I gjendur në krye të Partisë së Drejtësisë, një parti me orientim islamik, Agani ia doli që mandatin e kaluar të bëhet ministër i Shëndetësisë, pasi iu bashkua koalicionit të Begjet Pacollit, ndërkaq në zgjedhjet e kaluara ai me partinë e tij u fut në listën e PDK’së, për të marrë post ministri sërish në qeverinë e Isa Mustafës.

Por as atëherë, e duket as tash nuk ia arriti e nuk po ia arrin të realizojë gjë të hajrit nga premtimet e bëra me pompozitet. E tëra doli të jetë një farsë veç me qëllim të ardhjes në pushtet.

Në maj të vitit 2014, ai premtonte se shamia në shkolla do të lejohej që nga shtatori i atij viti. Natyrisht, kjo nuk ndodhi. Ai zotohej edhe për futjen e mësimbesimit në shkolla, por gjithçka mbeti një premtim i thatë. Ndërkaq, janë të panumërta premtimet e tij si ministër i Shëndetësisë, që kishin të bënin me sigurimin shëndetësor për kosovarët, që thoshte se do të ndodhë herë këtë vit, herë vitin tjetër. Zotohej se qytetarët e Kosovës do ta gëzojnë të drejtën e sigurimit shëndetësor më së largu në prill të vitit 2015. Jemi në janar të vitit 2016, apo jo? Natyrisht, pa sigurime shëndetësore.

* * *

Gjatë mandatit të tij, Agani nuk ia ka dalë të përmirësojë gjë në sistemin e shkatërruar e të korruptuar shëndetësor. Për më shumë, pikërisht gjatë kohës së tij si ministër kanë ndodhur skandali i stentave dhe skandali farmaceutik, ku u përfshinë zyrtarë të lartë të këtij sektori. Vetë Agani është njëri nga të dyshuarit e Prokurorisë, në rastin “Stentat”.

Por, pavarësisht performancës kurrfare si ministër i Shëndetësisë, ai u bë pjesë e kabinetit qeveritar të Isa Mustafës, tash si ministër i Mjedisit. Natyrisht, votat në zgjedhje i fitoi prapë me premtimet e vjetra dhe duke shitur moral. Ndërkohë, gjendja në sektorin e mbrotjes së mjedisit dhe planifikimit hapësinor është skandaloze.

Pararadhësi i tij në ministri, Dardan Gashi, pat nisur një aksion për rrënimin e ndërtimeve pa leje në Prevallë, me ç’rast ishin rrënuar rreth 300 sosh. Por aksioni nuk u vazhdua nga Agani, i cili nuk po ekzekuton rreth 40 vendime që kanë mbetur të nënshkruara nga Gashi dhe nuk po rishikon rreth 200 leje në aspektin e tejkalimit të ndërtimit në atë zonë.

Gashi ka thënë se Agani mendon se duhet të ndërpriten rrënimet në Prevallë dhe se duhet lejuar prapë eksploatimi i zhavorrit nëpër lumenj. Ai ka shfaqur dyshimin se vendimet nuk po ekzekutohen shkaku i objektit “Kulla e Jetimëve”. Ky objekt ilegal ka qenë në shënjestër të hetimeve dhe bastisjeve për aktivitete të dyshimta të lidhura me terrorizmin.

Ndërkohë, qendra turistike Brezovica vazhdon të shkatërrohet dhe të pushtohet nga ndërtimet e egra. Pavarësisht se aty janë identifikuar qindra objekte për rrënim, Agani vazhdon të rrijë duarkryq. Dhe të shesë moral.

Kështu u shfaq këtë fillimviti, kur në Facebook postoi fotografi në të cilat shihet duke i ndihmuar disa qytetarë të përfshirë në një aksident trafiku, në magjistralen Prishtinë-Pejë, si për të treguar se sa human është. Gjithsecili ndihmon në raste të atilla, por jo domosdoshmërisht e dëshmojnë këtë me postimin e fotografive në Facebook. Po të donte të tregojë humanizëm, Agani e ka pasur rastin gjatë një mandati si ministër i Shëndetësisë. S’ka nevojë të shesë moral e humanizëm tash. Ai ka përgjegjësi politike dhe duhet të veprojë politikisht. Të paktën t’i mbajë premtimet që, sipas ish-zyrtarëve të lartë të partisë së tij, që tashmë e kanë braktisur, nuk i ka realizuar asnjëherë, duke e tradhtuar elektoratin.