Fantastik Arb Manaj – realizon dy gola në fitoren bindëse të Balikesirspor

E diel fantastike për Arb Manajn. Sulmuesi dardan realizoi dy gola në fitoren 3-0 të Balikesirspor përballë Bursaspor.

Lojtari 22-vjeçar përfitoi nga një gafë e mbrojtjes kundërshtare dhe zhbllokoi takimin në minutën e 35-të.

Lojtari nga Klina tundi rrjetën sërish pas një ore lojë falë një goditje të fuqishme, teksa ekipi vendas gjeti edhe golin e tretë katër minuta përpara fundit të ndeshjes. Fitore e rëndësishme për Balikesirspor, që i është larguar disi zonës së ftohtë në divizionin e dytë të futbollit turk.

Me dygolëshin e sotëm, Manaj është ngjitur në kuotën e 7 realizimeve sezonale në kampionat dhe dy asistime.

Sulmuesi i Kosovës u transferua te Balikesirspor verën e kaluar dhe po zhvillon një sezon fantastik, duke qenë golashënuesi më i mirë i ekipit. /Telegrafi/