Fanol Perdedaj largohet nga klubi

Futbollisti Fanol Perdedaj nuk do ta vazhdojë kontratën me ekipin FC Cottbus. Ai dëshiron të luajë në ndonjë ligë më të lartë.

Mesfushori kosovar, Fanol Perdedaj, do të largohet gjatë verës nga ekipi i FC Energji Cottbus që aktualisht gjendet në vendin e gjashtë në ligën e tretë gjermane. “Unë nuk do ta vazhdoj më kontratën me Cottbusin”, ka thënë ish-futbollisti i Hertha BSC.

Pas një viti e gjysmë që luan te Cottbusi, Perdedaj dëshiron të gjejë një ekip i cili luan në ligat më të larta të futbollit. “Unë kam vendosur të gjej një rrugë tjetër. Unë dua të luaj në liga më të larta”, ka thënë 23-vjeçari nga Prizreni për mediet gjermane, transmeton albinfo.ch.

Siç bëhet e ditur, ekipi i ka ofruar Perdedajt një kontratë të re, por ai nuk e ka pranuar. Për largimin e tij është shprehur edhe trajneri Stefan Karmer. “Natyrisht se na vjen keq që Fanoli do të largohet. Ai ka oferta nga ligat e tjera dhe në rrethana të këtilla është shumë normale që të kërkojë skuadër të re”, ka thënë trajneri Karmer.

Fanol Perdedaj është 23-vjeçar, i cili që nga fëmijëria është larguar nga Kosova bashkë me familjen për të jetuar në Berlin të Gjermanisë. Ai është lojtar standard i përfaqësueses së Kosovës./Albinfo.ch/