Familjarët e viktimave: Serbët kanë bërë krim të dyfishtë

Familjarët e 44 viktimave civile të vrarëve më 5 prill të vitit 1999 në Rezallë të Skenderajt, e të larguar nga vendi i krimit nga forcat serbe, janë takuar me përfaqësues të institucioneve për t’u njoftuar për procesin e gërmimeve të nisura në Rudnicë të Rashkës. Familjarët thonë se forcat serbe mbi të dashurit e tyre kishin ushtruar krim të dyfishtë.

Në bazë të një dokumenti të lëshuar nga forcat serbe, po dokumentohet nga vetë serbët se në Rezallë ka pasur masakër dhe se ata këtë po e pranojnë.

“Ne familjarët jemi në kërkim të tyre”, thotë Muhamet Rukolli, familjar.

Kushtrim Gara, nga Komisioni për persona të zhdukur, deklaroi se gjetjet e fundit të mbetjeve mortore obligojnë për thirrje te institucionet ndërkombëtare dhe ato serbe që të reflektojnë në këto raste, në përpjekjen e përbashkët për gjetjen e mbi 1700 personave.

Zyrtarë qeveritarë thonë se varreza masive në Rudnicë pas 15 vjetëve hapet nga kërkesat e pareshtura të ndërkombëtarëve dhe palës kosovare, transmeton RTK.

“Në pamundësi për t’u përballur me forcat e UÇK-së dhe forcat ndërkombëtare të atyre të NATO-s, ata u hodhën ndaj popullit të pafajshëm – pleq, fëmijë, gra e burra – vetëm pse ishin shqiptarë”, deklaroi Prenk Gjetaj, kryetar i Komisionit Qeveritar për persona të pagjetur.

Derisa gërmimet në varrezën masive të Rudnicës vazhdojnë edhe gati për dy muajt e ardhshëm, familjarët e të pagjeturve nga Rezalla thonë se nuk mund të jenë të qetë deri në kthimin e eshtrave të të rënëve. /Telegrafi/