Familjarët e rehatuar të LDK-së

Sami Hamiti prin me numrin e familjarëve të punësuar në sektorët kyçë të komunës. Gra, vëllezër, mbesa e të afërm të tjerë të ish pushtetarëve të Prishtinës, janë punësuar në pozita të rëndësishme në ndërmarrjet publike komunale. Ish kryesuesi i Asamblesë, Sami Hamiti, është kampioni me numrin e familjarëve të punësuar në sektorët kyçë të komunës më të madhe në vend – shkruan gazeta Zëri.

Jo keq me punësime të familjarëve në nivel lokal nuk e ka lënë as ish kryetari Ismet Beqiri, i cili vëllanë e tij e ka punësuar si udhëheqës sektori të pronës, nga i cili varen shfrytëzimi dhe qiraja e lokaleve afariste.

Edhe pasardhësi i Beqirit në komunë, Isa Mustafa, e ka punësuar mbesën.

Kryeshefi i Kompanisë Regjionale të Mbeturinave “Pastrimi”, Feim Salihu, që është djali i tezës së Sami Hamitit, njihet për punësime të mëdha që kanë ndodhur në kohën e tij, duke e rritur numrin e punëtorëve të ndërmarrjes për më tepër se 100 veta.