Falja e borxheve, sekret i Qeverisë së oligarkëve

Mungesë e theksuar transparence e institucioneve kosovare. Dhjetëra milionë euro do t’u falen bizneseve

Anëtari i komisionit për Buxhet dhe Financa, Bali Muharremaj, tha se edhe refuzimi i ATK-së për të treguar se si po falen borxhet tregon haptazi se koalicioni në pushtet nuk e ka për qëllim që të përmirësohet klima e të bërit biznes në Kosovë, por po lirohen nga borxhet vetëm ato biznese që kanë lidhje politike dhe që janë të kapura nga pushteti

Falja e borxheve po shoqërohet me mungesë të theksuar të transparencës. Sipas vlerësimeve të institucioneve, shuma e borxhit që do të falet vlerësohet të jetë rreth 680 milionë euro, rreth 148 milionë borxh ndaj ATK-së, rreth 6 milionë borxh ndaj Doganës së Kosovës, rreth 57 milionë borxh për tatimin në pronë dhe rreth 465 milionë borxh ndaj ndërmarrjeve publike. Zyrtarët e ATK-së, me gjithë pyetjet e dërguara gjatë ditës së hënë, se si po falen borxhet nga ATK-ja, si edhe çështja se kur dhe a do të publikohen fare listat që përfitojnë nga amnistimi i qeverisë, nuk kanë dhënë përgjigje.

Anëtari i komisionit për Buxhet dhe Financa, Bali Muharremaj(AAK), tha se edhe refuzimi i ATK-së për të treguar se si po falen borxhet tregon haptazi se koalicioni në pushtet nuk e ka për qëllim që të përmirësohet klima e të bërit biznes në Kosovë, por po lirohen nga borxhet vetëm ato biznese që kanë lidhje politike dhe që janë të kapura nga pushteti./kosova sot/