EULEX-i nuk mund të jetë i vetmi fajtor

Edhe dy javë pas publikimit të raportit të Gjykatës evropiane të auditorëve për punën e BE-së në Kosovë, i cili pati konstatuar se në këtë fushë BE-ja ka dështuar dhe qindra miliona euro nuk kanë ndihmuar shumë në përmirësimin e gjendjes, në qarqet diplomatike të BE-së kjo temë nuk është hequr nga rendi i ditës.

Diplomatë të shumë shteteve anëtare, i kanë thënë “Kohës Ditore”, se janë të shqetësuar për gjendjen në Kosovë në fushën e rendit dhe ligjit dhe kanë thënë se “janë duke shpenzuar me shpejtësi arsyetimet për dështimet në Kosovë, sidomos në luftë kundër korrupsionit dhe krimit të organizuar”.

Ata kanë pranuar se EULEX-i “ka mundur dhe është dashur të kishte bërë më shumë” në fushën e rendit dhe ligjit por kanë shtuar se “do të jetë jokorrekte që tërë barra për dështimet në Kosovë t’i bjerë EULEX-it”.