EULEX-i, një dekadë në Kosovë

Misioni i Bashkimit Evropian për Sundim të Ligjit, EULEX, do të jetë misioni më i gjatë i cili ka shërbyer në Kosovë. Qeveria e Kosovës ka vendosur që t’ia zgjatë mandatin, deri në vitin 2018, duke bërë kështu që ky mision të qëndrojë në Kosovë përplot një dekadë. Ky vendim është kundërshtuar nga Lëvizja “Vetëvendosje”, ndërsa është mirëpritur nga shumica e partive politike në vend.

“Kemi ardhur në përfundim që mandati i EULEX-it, të vazhdojë edhe për së paku dy vjet në Kosovë, që nënkupton deri në qershor të vitit 2018. Po ashtu, jemi pajtuar së bashku me BE-në që EULEX-i të transferojë një numër të konsiderueshëm të rasteve tek institucionet vendore të cilat konsiderohen të transferueshme dhe mund të trajtohen me sukses nga institucionet vendore”, ka thënë kryeministri Isa Mustafa.

Ai ka bërë të ditur se në këtë drejtim, Qeveria ka propozuar që një numër i rasteve të cilat kanë filluar më herët të mbeten në kompetencë në kuadër të EULEX-it dhe transferi i tyre të jetë në mënyrë diskrecionale nga EULEX-i për një arsyetim dhe llogaridhënie që mund të jetë te institucionet vendore, shkruan sot gazeta ‘Zeri’.

Të nevojshme praninë e EULEX-it, në Kosovë e kanë parë edhe dy liderët e partive opozitare, ai i “Nismës për Kosovën”, Fatmir Limaj, dhe ai i Aleancës për Ardhmërinë e Kosovës, Ramush Haradinaj.

Sipas kryetarit të “Nismës”, vazhdimi i mandatit të EULEX-it, është i nevojshëm, por, duhet të jetë me kapacitete të tjera. “Besoj se është i nevojshëm vazhdimi i mandatit të EULEX-it, natyrisht me një kapacitet të ndryshëm. Nuk e di se sa kanë negociuar dhe si kanë negociuar, prezenca e tyre është e nevojshme. Vetë fakti se gjendja në të cilën është vendi po tregon se në çfarë situate jemi. Imagjinoni kur një Gjykatë Kushtetuese i vlerëson dhe i karakterizon gjykatësit si një rrugaç kjo tregon më së miri si është drejtësia në këtë vend”, ka thënë Limaj./zeri/