“Errësia – Drita”, mesazhi i fuqishëm i të rinjve kundër drogës: Policia dhe artistët e rinj bashkojnë zërin në Gjilan

Gjilan – Në një kohë kur sfidat sociale po prekin gjithnjë e më shumë të rinjtë, arti dhe vetëdijesimi janë kthyer në armë të fuqishme kundër dukurive negative. Me këtë frymë, Drejtoria Rajonale e Policisë në Gjilan, përmes Drejtorisë së Policisë në Bashkësi dhe Parandalim, në bashkëpunim me Shkollën e Mesme të Arteve Pamore “Adem Kastrati”, kanë realizuar projektin sensibilizues “Errësia – Drita”, me fokus luftimin e përdorimit të substancave narkotike tek të rinjtë.

Aktiviteti ka bashkuar policinë, stafin arsimor dhe nxënësit e shkollës në një mesazh të përbashkët për ndërgjegjësim, reflektim dhe promovim të jetës së shëndetshme përmes fuqisë së artit dhe mendimit kritik.

Në këtë ngjarje morën pjesë Drejtori i Drejtorisë Rajonale të Policisë në Gjilan, kolonel Agron Rukiqi, Drejtori i Policisë në Bashkësi dhe Parandalim, major Ramadan Ahmeti, si dhe drejtori i Shkollës së Arteve Pamore “Adem Kastrati”, Roland Masurica. Në fjalët e tyre, ata theksuan rëndësinë jetike të parandalimit të përdorimit të narkotikëve dhe ndikimin që këto substanca kanë në shëndetin, të ardhmen dhe sigurinë e të rinjve.

Pjesa më emocionale dhe domethënëse e aktivitetit ishte ekspozimi i punimeve artistike të realizuara nga nxënësit, të cilët përmes ngjyrave, figurave dhe simbolikës artistike paraqitën errësirën që sjell droga dhe dritën e shpresës, vetëdijesimit dhe jetës së shëndetshme.

Punimet u vlerësuan si mesazhe të fuqishme artistike dhe sociale kundër përdorimit të substancave narkotike, ndërsa tri prej tyre u shpërblyen me mirënjohje dhe dhurata simbolike nga Policia e Kosovës për kreativitetin dhe ndikimin e tyre sensibilizues.

Në përmbyllje të aktivitetit, organizatorët vlerësuan lart bashkëpunimin ndërinstitucional ndërmjet Policisë së Kosovës dhe institucioneve arsimore, duke e konsideruar atë një element kyç në mbrojtjen e të rinjve nga dukuritë negative dhe në ndërtimin e një shoqërie më të shëndetshme dhe më të vetëdijshme./rajonipress/