Ermal Krasniqi shënon golin e parë me fanellën e Rapid Bukureshtit

Futbollisti kosovar, Ermal Krasniqi, ka shënuar golin e tij të parë me fanellën e Rapid Bukureshtit.

Krasniqi debutoi për ekipin rumun në miqësoren ndaj ekipit turk Sakaryaspor, ndërsa golin e parë e gjeti në duelin ndaj ekipit të elitës belge KVC Westerlos.

Rapidi pësoi humbje me rezultat 3-2 në këtë miqësore dhe Krasniqi e gjeti golin në minutën e 66-të për të barazuar shifrat në 1-1.

Krasniqi u transferua gjatë afatit kalimtar të janarit tek Rapidi nga ekipi tjetër rumun Cluj për shumën e 1 milionë eurove.

Në këtë ndeshje nga minuta e parë e nisën edhe dyshja Albion Rrahmani dhe Florent Hasani.

Rapidi tani do t’i rikthehet ndeshjeve në kampionat, ku të premten e 19 janarit do të jenë nikoqir të Craiovas, ndeshje kjo e cila do të jetë e para për ta në vitin 2024./Telegrafi/