Engel: I fola pak Ramushit për Specialen!

Kërkesën amerikane që Kosova ta themelojë Gjykatën Speciale, kongresisti amerikan, Eliot Engel, ia ka thënë edhe kryetarit të AAK-së, Ramush Haradinajt.Paraditen e së enjtes, derisa delegatët e partisë së Haradinajt po mblidheshin për Kuvendin zgjedhor, kryetari i tyre, bashkë me disa zyrtarë e deputetë të AAK-së, takoi kongresistin Engel.

Takimi u mbajt në një kafiteri ne Prishtinë. E, se për çfarë u bisedua, këtë e thotë Engel për TV Rrokum.

“Ia përmenda edhe një herë Haradinajt mendimin tim se duhet të votohet Gjykata Speciale. E kam thënë këtë gjatë gjithë qëndrimit tim në Kosovë. Mendoj se do të jetë njëra prej dy mundësive: ose ka me pasë Gjykatë Speciale, ose ka me pasë gjykatë të Kombeve të Bashkuara. Populli i Kosovës ka me pasë nji rezultat më të drejtë nga Gjykata Speciale se nga ajo e OKB-së”, ka thënë ai.

Edhe Haradinaj tregoi se me kongresistin kanë folur për Specialen.

Bashkë me dy partitë tjera opozitare, VV e NISMA, AAK-ja tash është kundër krijimit te Gjykatës Speciale. Por, nuk kishte këtë qëndrim prej fillimit. Kur u votua marrëveshja ndërkombëtare, apo letërkëmbimi i presidentes Atifete Jahajaga me shefen e atëhershme te diplomacisë evropiane, Baroneshen Catherine Ashton, AAK vitin e kaluar i dha mbështetje kësaj. /Rrokum/