Ende nuk dihet niveli i kreditimit të Kosovës!

Prishtinë – Kosova ka hyrë që nga viti i kaluar në kanalet e kompanisë ndërkombëtare “Standard & Poor’s”, e cila është duke bërë nivelin kreditor të vendit. Zyrtarë të kësaj kompanie kanë qëndruar disa herë në Kosovë për të marrë detaje, mirëpo askush nga ta nuk i është përgjigjur kërkesës së KTV-së, e cila dy herë në periudha të ndryshme ka kërkuar përgjigje se deri ku ka arritur me përcaktimin e nivelit të kreditimit të shtetit.

Nga ana tjetër, zyrtarë të Ministrisë së Financave, kanë thënë se janë duke e furnizuar vazhdimisht këtë kompani me të dhëna, porse dalja përfundimtare e nivelit të kreditimit të vendit pritet të marrë kohë.

Ekspertë të financave thonë se kreditimi i vendit mund të sjellë edhe të mira për vendin, por edhe shumë të këqija, varësisht prej rezultateve që dalin. Eksperti i financave Flamur Keqa, nuk është pajtuar me deklarimet e disa prej zyrtarëve qeveritarë, të cilët kanë thënë se Kosova do të ketë nivelin e njëjtë të kreditimit, siç e kanë vendet e rajonit.

Pjesë e analizave të riskut kreditor të Kosovës pritet të jenë funksionimi i euros, borxhi i brendshëm dhe i jashtëm, rreziqet e sektorit bankar, rreziqet nga situata politike dhe ekonomike, si dhe parashikimet afatmesme e afatshkurtra ekonomike dhe politike.