Emery: Jam shumë i lumtur me Xhakën, ai është lojtar shumë i mirë

Trajneri i Arsenalit, Unai Emery ishte i kënaqur me performancën e Granit Xhaka në barazimin 1-1 me Liverpoolin.

Mesfushori shqiptar bëri një ndërhyrje fantastike në zonën e penaltisë kundër Mohamed Salahut, duke dëshmuar se kundërshtarët nuk do ta kenë më të lehtë.

Kjo ka bërë që të kënaqet strategu spanjoll, por edhe tifozët e pranishëm në shkallët e stadiumit The Emirates, të cilët e duartrokiten këtë veprim të futbollistit tonë.

“Momenti më i mirë në futboll është kur fitoni, por gjithashtu i pëlqej edhe veprimet individuale mbrojtëse”.

“Mendoj se ne kemi prodhuar balancë në kuadër të intensitetit të lojës kundër Liverpoolit. Lidhja me tifozët është shumë e rëndësishme. Ata po krijojnë atmosferë fantastike. Përkrahësit i dhanë lojtarëve një shtytje të rëndësishme dhe energji për të qenë së bashku”.

“Jam shumë i lumtur me Xhakën sepse është lojtar shumë i mirë. Ai angazhohet tejet mase, por edhe dëshiron të përmirësohet, të cilën gjë mund ta bëjë në çdo ndeshje”.

“Është e rëndësishme për bilancin tonë që kemi dy mesfushorë si Xhaka dhe Lucas Torreira. Ata janë taktikisht të mirë dhe angazhimi i tyre po na ndihmon në mbrojtje”, tha trajneri.

Ndryshe, Liverpool dhe Arsenal mbesin në pjesën e lartë të renditjes tabelore të Ligës Premier. /Telegrafi/