Emathia

Poezi nga Atdhe Geci

Historinë që unë e kam në shpinë
është histori krejt pak e njohur,
histori me mungesë të emrave
dhe histori me dhimbje të kokës

Historinë që unë e kam në shpinë
mund të na tronditë rëndë me të
vërtetat e fshehura e të panjohura,
mbi këtë tokë të gjelbërt të atdheut
kam vërejtje për kohën tonë, dhe
për cenzorët që e mbajtën fshehur
alfabetin pellazg, dhe të fshehtën
për prejardhjen tonë pellazgo-ilire

Historinë që unë e kam në shpinë,
rrahur e kanë rëndë për të vërtetën,
rrahur e kanë rëndë për kryengritje
rrahur e kanë rëndë për qëllimet,

Historinë që unë e kam në shpinë,
poshtëruar ma kanë të mëdhenjtë,
poshtëruar ma kanë fqinjët dhe,
poshtëruar e kanë nga pak dhe tanët,

Historinë që unë e kam në shpinë,
e kam me të rënë dhe të plagosur
me traktate, e tribunale gjyqesh,
histori, të keqtrajtuar nga drejtësia.

Historia që unë e kam në shpinë
është histori e të gjitha kohërave,
histori qytetëruese e atdheut tim,
histori me shumë hulli të gjakut.

Historinë që unë e kam në shpinë,
i ka 300 shekuj jetë të qytetarit,
300 shekuj të luftave të pakryera
dhe 300 shekuj me plis të bardhë.

Në atdheun tim, Shqipëri-Dardani
nuk ka luftë që s ́e ka një pikë lot,
nuk ka luftë që s ́e ka një varr
dhe s ́ka këngë që se ka një ëndërr.

1 . Emathia – Emri i lashtë i Maqedonisë.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).