Ekspres – ligjet të marrin fund

Deputetët kërkojnë që praktika e përshpejtuar e shqyrtimit të projektligjeve duhet të ndërpritet. Sipas tyre, neni 81 i Rregullores së punës, që ka të bëjë me shmangien e rregullores është keqpërdorur si në mandatin e kaluar dhe gjithashtu po keqpërdoret edhe tani.

Fillimi i kësaj jave të re të punës në Kuvend, do të riaktivizojë deputetët për të filluar me punën e tyre në komisionet parlamentare, me qëllim të përgatitjes më të shpejtë të projektligjeve, të cilat i ka dërguar në pakon e parë të prioritetit të vetë ekzekutivit të vendit, pas miratimit me urgjencë të Ligjit të buxhetit në fundvitin e kaluar.

Ngutja e bërë me shqyrtimin e Ligjit të buxhetit në mes të dy leximeve, është lexuar si një veprim me shkelje të rregullores së punës së Kuvendit, prandaj anëtarët e Komisionit të ligjebe janë zotuar se gjatë periudhës së re të rregullt të trajtimit të projektligjeve në Kuvend, nuk do të lejojnë imponimin e procedurave të shpejta të bërjes së ligjeve që e dëmton seriozisht bërjen e tyre kualitative, të qëndrueshme në kohë, gjatë zbatimit nga institucionet përkatëse të buxhetit./Kosova Sot/