Ekspertët e Planifikimit Hapësinor prezantojnë planin e punës për vitin 2016

Gjilan – Komiteti Konsultativ i Ekspertëve të Planifikimit Hapësinor (KKEPH), i cili është themeluar para disa ditësh, ka mbajtur të enjten takimin e parë zyrtar, ku ka prezantuar dhe shqyrtuar planin e punës për vitin 2016.

Avni Aliu, kryesues i Komitetit, ka thënë se janë planifikuar një varg aktivitetesh, siç janë takimet e rregullta me qytetarë dhe përfaqësues të Këshillave lokale, pjesëmarrja në mbledhjet e Kuvendit Komunal, takimet me drejtorët komunalë, me shoqërinë civile, grupet e interesit dhe të tjera.

Detyrë e këtij Komiteti është që të japë mendime, propozime dhe vërejtje në dokumentat e planifikimit hapësinor, siç janë Plani Zhvillimor Urban dhe Plani Rregullativ Urban si dhe dokumentat tjera të përcaktuara me Ligjin për Planifikim Hapësinor të Kosovës e që kanë të bëjnë me territorin e Komunës së Gjilanit.

E gjithë veprimtaria e kësaj trupe të ekspertëve ka të bëjë me planifikimin hapësinor.
“Ne si ekspertë do t`i identifikojmë nevojat e qytetarëve në fushën e planifikimit hapësinor dhe do t`i paraqesim ato para asamblesë komunale”, ka thënë Avni Aliu, kryesues i KKPH./rajonipress/