Nga – Adrian Çollaku – Kryeministri i Kosovës dhe i pari i partisë më të madhe në vend, Hashim Thaçi me hapat drejt përqafimit me Ramush Haradinajn e partinë e tij, ka arritur dy efekte shumë të rëndësishme për të dhe për të ardhmen e partisë, që ai e udhëheqë.
Së pari, përafrimi me Aleancën për Ardhmërinë e Kosovës, do ta shpëtojë politikisht edhe një herë Thaçin dhe partinë e tij nga ambisi, ku është futur me aferat që po na i shfaq në vazhdime si seritë latino-amerikane në TV-të tona pesëparëshe.
Pos që do ta nxjerrë atë me “fytyrë” nga skandalet e shumta që e kanë kapluar këtë qeverisje, sa që po të ishim shtet normal, ku sundon ligji, shumë prej zyrtarëve shtetërorë do të ishin te “vendi”- prapa grilave, atë do ta “shpëtojë” edhe nga bisedimet tashmë të filluara politike me Serbinë, ku janë të mëdha gjasat që i vetëm të dalë “ i lagur”. Kompromiset e radhës që pritet të ndodhin në këto bisedime, Thaçi do t’i kishte të pamundur t’i bënte pa përkrahjen e partisë së “Dukagjinit”.
Futja e nënkryetarit të parë të AAK-së, Blerim Shalës, në delegacionin e bisedimeve, nuk do mend se është një komoditet dhe një relaksim i madh për udhëheqësin e bisedimeve, Hashim Thaçin që, normalisht, barrën e përgjegjësisë për kompromiset joparimore që mund të kërkohen, t’i shpërndajë në sa më shumë aktorë. U fut ose jo zyrtarisht AAK-ja në qeverisje, kjo nuk do të jetë shumë e rëndësishme.
Nga disponimi i deritashëm edhe i ndërkombëtarëve, shihet se nuk do të jetë shumë me urgjencë ndërrimi i kryeministrit, pra, zëvendësimi i Hashim Thaçit me Ramush Haradinajn. Të paktën jo pa përfunduar bisedimet. Kryesore që edhe Ramushi në një formë është brenda.
Pra, me një fjalë barrën e përgjegjësisë për bisedimet politike me Serbinë, nuk do ta bartë vetëm Hashim Thaçi dhe PDK-ja. Një pjesë e kësaj barre do t’i shkarkohet edhe partisë së Ramush Haradinajt, që padyshim se mund të ketë edhe pasoja për të ardhmen e AAK-së…
Dhe efekti i dytë i përafrimit Thaçi- Haradinaj, do të jetë shkatërrimi i së djathtës në Kosovë. Ky përafrim PDK- AAK, më saktësisht do të dobësojë shumë gjasat për çfarëdo plani dhe ideje të partive të djathta që të krijojnë një bllok politik.
Iniciativa e liderit të Aleancës për Ardhmërinë e Kosovës, Ramush Haradinaj, pak kohë para se të rikthehej lënda e tij për rigjykim në Hagë dhe iniciativa e fundit e liderit të Lidhjes Demokratike të Kosovës, Isa Mustafa për bashkimin e spektrit të djathtë politik duket se do të marrë fund. Të paktën për një periudhë kohore. E, bashkë me të edhe iniciativa e vetme e cila ka mundur ta rrëzonte PDK-në nga pushteti dhe do ta largonte këtë keqqeverisje që ka lëshuar rrënjë.
Prandaj, edhe kjo çarje e partive të djathta, që ka arritur ta bëjë kreu i PDK-së, Hashim Thaçi, tregon për aftësitë e tij politike në punë të tilla që padyshim do t’ia zgjasin jetën kësaj qeverisje, edhe po të mos bënte asgjë tjetër, s’ka nevojë të dëshmojë më shumë se është e dëmshme për vendin.
Sidoqoftë, sikurse në lojë shahu, ai i cili i luan figurat më mençur edhe e fiton lojën. Njëjtë, është kjo far puna e politikës. Ai i cili i luan më mirë figurat edhe fiton. Këtë lojë “shahu” më së miri duket se po e luan kryetari i PDK-së, Hashim Thaçi. Fatkeqësisht vetëm në interes të vetin e të PDK-së. E sa i përket Kosovës, të ardhmes së saj, ka kohë dhe ka kush!
