Edi Rama për vdekjen e Bukoshit: Humbëm një shqiptar të mirë

Kryeministri i Shqipërisë, Edi Rama, ka reaguar pas lajmit për ndarjen nga jeta të ish-kryeministrit të Qeverisë së Republikës së Kosovës në ekzil, Bujar Bukoshi.

Përmes një postimi në rrjetet sociale, Rama ka shprehur ngushëllimet më të sinqerta për familjen Bukoshi dhe gjithë Kosovën, duke e vlerësuar atë si një figurë të ndjeshme dhe të rëndësishme në historinë politike shqiptare.

“U prehsh në paqe. Ngushëllimet më të ndjera familjes dhe Kosovës për humbjen e një shqiptari të mirë, politikani të rafinuar e njeriu të ndjeshëm si Bujar Bukoshi,” shkroi Rama.

Bujar Bukoshi ishte një prej figurave qendrore të skenës politike të Kosovës në vitet ’90, duke shërbyer si kryeministër i Qeverisë së Kosovës në ekzil gjatë një periudhe të rëndë për vendin. Ai mbetet një emër i respektuar për kontributin e tij në përpjekjet për liri dhe pavarësi.