Edi Rama letër politikanëve: Mos harroni, uniteti është vendimtar për suksesin në Luginë

Kryeministri i Republikës së Shqipërisë Edi Rama në përgjigjen e letrës që i kishin dërguar deputetët Riza Halimi dhe Shaip Kamberi, në email adresën e kryetarit të PVD – së Riza Halimi, fillimisht përveç që përcjell urimet për vitin e ri 2015, kërkon unitet mes politikanëve lokal dhe atyre qendror.

Kryeministri shqiptar, duke theksuar se qeveria e Shqipërisë ka qasje të kthjellët për situatën në Luginë, potencon se Qeveria e Shqipërisë do të vazhdojë të mbështesë shqiptarët e Luginës, mirëpo thekson se uniteti mes faktorit politik është vendimtarë për avancimin e të drejtave të shqiptarëve në Luginë të Preshevës.

“Do të vijojmë të ju mbështesim, por mos harroni asnji dekikë se uniteti juaj (ndërmjet të zgjedhurve vendor e të atyre në parlament) është vendimtar për suksesin e çdo sipërmarrje që ka lidhje me avancimin e të drejtave të Shqiptarëve në Luginë”, thuhet në kumtesën e Partisë për Veprim Demokratik, dërguar në redaksinë e portalit informativ Titulli.com.

Në fund të kësaj kumtese kryeministri vazhdon me përshëndetjen, “Vëllazërisht e me të falat më të ngrohta për të gjithë miqtë e zemrës atje”.

Vlen theksuar se kryeministri Edi Rama, në fund të muajit dhjetor të vitit 2014, kishte folur për prapambetjen e përfaqësuesve politikë të shqiptarëve të Luginës, në raport me shqiptarët si komb./Titulli.com/