Edi Rama i bindur se Kuvendi Kosovës do të votojë Specialen

Nuk do ketë ndryshime në Qeverinë shqiptare në muajin shtator pas pushimeve, por se shteti do të nis një valë të re aksioni si me energjinë elektrike dhe karburantin, ndaj të gjithë atyre që nuk kanë paguar taksat.

Kështu ka deklaruar sot kryeministri Edi Rama, gjatë një konference për shtyp ku para gazetarëve ka folur për bilancin e 300 ditëve të dyta të qeverisë së tij.

Rama u pyet në këtë konferencë edhe për Gjykatën Speciale të Kosovës, dhe për përfshirjen e shqiptarëve në organizatën terroriste ISIS. Lidhur me krijimin e Gjykatës Speciale të Kosovës, Rama shprehu besimin e plotë se Parlamenti i Kosovës do të marrë vendimin e duhur, ndërsa për akuzat ndaj shqiptarëve lidhur me ISIS, tha se kësaj kauze barbare i janë bashkuar njerëz nga çdo komb, jo vetëm shqiptarë.

“Normalisht është vullneti i kuvendit të Kosovës edhe unë jam i bindur se Kuvendi i Kosovës do marr vendimin më të mirë. Lidhur me terrorizmin, kur janë bërë edhe norvegjezët, danezët edhe anglezët, luftëtarë të kauzà «s barbare, shqiptarët nuk mund të mos prekeshin, por kush thotë që shqiptarët janë problem, ka një problem me veten dhe me shqiptarët”, tha Rama.

Ndërkohë Rama ka mohuar që të ketë në Kuvend deputetë të inkriminuar apo që kanë probleme me ligjin. Ai tha se gjykime të ndodhura shumë larg në të shkuarën apo edhe afër por përtej kufirit të dëshmisë penale, adresohen me ligj nëse duam t’i adresojmë, dhe ne do i adresojmë me ligj.