Edhe ZAP-i në kthetrat e mafisë politike

Prej një viti, shteti pa Auditor të përgjithshëm. Propozimi i presidentes dështoi në seancën e kaluar të Kuvendit.”Pretendimet për ta vënë në kontroll Auditorin janë të rrezikshme për vendin, sepse po synohet që të kontrollohen dhe të zhvaten një pjesë e madhe e parave nga 1 miliard euro sa janë në qarkullim vjetor nëpër tenderët e ndryshëm”, ka thënë deputeti opozitar Zafir Berisha për “Kosova Sot”.

Ekspertë të ekonomisë dhe deputetë të opozitës janë të mendimit se mosemërimi i Auditorit të përgjithshëm të Kosovës që dështoi në seancën e javës së kaluar në Kuvend, është një vonesë e qëllimshme dhe me fajin e koalicionit qeveritar.

Sipas tyre, kjo zvarritje po tregon haptazi se krimi ekonomik tashmë e ka kapur edhe zgjedhjen e Auditorit të përgjithshëm.

Deputeti i Nismës, Zafir Berisha, thotë se vetë fakti se koalicioni PDK-LDK nuk gjeti gjuhë të përbashkët që ta zgjedhë Auditorin, tregon se grupe të caktuara të parapolitikës në pushtet janë të interesuara që edhe në këtë mekanizëm të kontrollit shtetëror të kenë gisht, sepse janë raportet e Auditorit ato që tregojnë për shkeljet e rënda që bëhen në dikastere të ndryshme të Kosovës nëpër kodet buxhetore të të dyja niveleve qeverisëse./kosova sot/