Edhe puna vullnetare e të rinjve do të ketë benificione

Gjilan- Veton Nevzadi ka thënë se vullnetarët të cilët do të pajisen me kartela të veçanta do të kenë përparësi në punësim, duke u llogaritur si përvojë pune si dhe komuna dhe DKRS është mbështetëse dhe po punon në realizimin e këtij projekti.

Të rinjtë gjilanas të organizuar në rrjete rinore kanë organizuar konferencë për Vullnetarizmin nga Këshilli i Veprimit Rinor Lokal në Gjilan. Në këtë konferencë kanë marrë pjesë edhe Drejtori i Drejtorisë për Kulturë Rini dhe Sport Veton Nevzadi, kryetari i KQVR-së, Mensur Morina, si dhe organizatat bashkëpunuese CHANGE dhe GELECEK.

Veton Nevzadi ka thënë se Komuna e Gjilanit është komuna e parë që po punon për formimin e një rregulloreje e cila do të bëjë rregullimin e punës vullnetare që të ketë benificione.“Pas një diskutimi që pata me kryetarin e komunës kemi vlerësuar se vullnetarët të cilët do të pajisen me kartela të veçanta do të kenë përparësi në punësim, duke u llogaritur si përvojë pune si dhe komuna dhe DKRS është mbështetëse dhe po punon në realizimin e këtij projekti“ tha Nevzadi.

Kurse kryetari i Këshillit Qendror për Veprim Lokal Mensur Morina tha se po punojnë vazhdimisht në këtë drejtim në mënyrë që t`i mbrojmë interesat e të rinjve tanë. “ Në bazë të hulumtimeve si dhe organizimeve që kemi pasur me të rinj 70 % e tyre janë shprehur të gatshëm të jenë vullnetarë“ ka thënë Morina.

Edhe Ardit Ajvazi kryetar i Këshillit Rinor të Veprimit Rinor Lokal në Gjilan tha se në të gjitha aktivitetet e KVRL-së kemi të bëjmë me vullnetarizmin. “Pajisja me kartelë që do të identifikoj vullnetarët do t`u japë shumë privilegje dhe mendojmë se ky projekt është mjaft i nevojshëm“ tha Ajvazi.

Vullnetarët e pranishëm e përshëndetën dhe e vlerësuan të arsyeshëm këtë projekt, duke ndihmuar në dhënien e sugjerimeve për hartimin e rregullores komunale për vullnetarizmin.

Ndërsa sugjerimet që dolën nga kjo konferencë ishin të ketë lehtësime në mënyrë që vullnetarët ta kenë pa pagesë transportin urban,shërbimet në institucionet publike si dhe përparësi në punësim. /rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).