Edhe Pacolli i bashkohet Grenellit në kritikën për mos heqje të vizave

Pas shkëmbimit të cicërimave në Twitter në mes të të dërguarit të posaçëm të Shteteteve të Bashkuara të Amerikës për dialogun Kosovë-Serbi, Richard Grenell, dhe eurodeputetes së Parlamentit Evropian, Viola von Cramon-Taubadel, ka ndërhyrë edhe Behgjet Pacolli, përcjell Zëri.

Ai ka përkrahur Grenellin i cili ka kërkuar heqjen e vizave për kosovarët nga Bashkimi Europian.

Pacolli përmes Twetterit i ka reaguar eurodeputetes, e cila njëherësh është edhe raportuese për Kosovën në Parlamentin Evropian, duke thënë se është momenti i fundit që BE-ja ta mbajë premtimin për heqjen e vizave.

“Është koha që BE-ja të marrë vendimet për të cilat i detyrohet popullit të Kosovës bazuar në rekomandimet e Komisonti Evropian. Ne e bëmë pjesën tonë. Tani nën presidencën gjermane është momenti i fundit për të përmbushur premtimin”, shkruan Pacolli. /Zëri

E gjithë kjo bisedë filloi kur Cramon kritikoi Washingtonin duke thënë se është interesante fakti që nuk ka rezultate të marrëveshjeve në mes Kosovës dhe Serbisë.