Edhe një viktimë nga plumbat qorr

Një mashkull, rreth 32 vjeçar, ka gjetur vdekjen si rezultat i plagëve të marra nga armë zjarri.

Viktima ishte transferuar me urgjencë në QKUK Prishtinë, ku edhe është konfirmuar vdekja e tij.

Njësitë e para të Policisë në vend të ngjarjes, kanë kuptuar se disa persona, të gjithë kushërinj në mes vete, duke u argëtuar para shtëpive të tyre në fshatin Dolak, kanë shkrepur armë zjarri, ndërsa aksidentalisht është plagosur viktima, A. Kuqi, rreth 32 vjeç.

Hetuesit policor së bashku me prokurorin publik, kanë bërë këqyrjen e vendit të ngjarjes ndërsa në vend ngjarje, janë gjetur dhe marrë si pjesë të provave materiale; së paku 15 gëzhoja të armës, të kalibrave të ndryshëm.

Armët të cilat kanë qenë të përfshira në këtë rast, ende nuk janë identifikuar.

Ndaj tre personave, të cilët ishin me viktimën në çastin e plagosjes, është caktuar masa e ndalimit policor për shkak të mos-bashkëpunimit ndërsa një tjetër i dyshuar, identiteti i të cilit është i njohur për Policinë, është arratisur nga vendi i ngjarjes dhe Policia është në kërkim të tij./Indeksonline/