Edhe një shtëpi për një familje skamnore

Gjilan- Një bashkëpunim i mirë mes Komunës së Novobërdës dhe zyrës së Kryeministrit për çështje të komuniteteve e ka bërë familjen Abazi me shtëpi të re.

Me këtë rast Bajrush Ymeri kryetar i komunës së Novobërdës dhe Srgjan Popoviq Drejtor i Zyrës për çështje të komuniteteve pranë Kabinetit të Kryeministrit bënë përurimin e shtëpisë së familjes Abazi nga fshati Llabjan.

Familja e Ismet Abazit jetonte në kushte të papërshtatshme për jetesë, dhe falë ndihmës së Zyrës për çështje të komuniteteve pranë Kabinetit të Kryeministrit dhe Komunës së Novobërdës problemin e kësaj familjeje tani më është zgjidhur.

Kryetari i Komunës falënderoi zotin Popoviq për ndihmën që është ofruar. Familja Abazi ka jetuar në kushte të vështira dhe qëllimi i gjithë neve është që kudo që ka raste të vështira të mundohemi që të ju ndihmojmë. “Mirëpo të gjitha këto raste të vështira nuk kem mundësi me i zgjidhë, por fal ndihmës së miqve tanë po mundohemi që të ju plotësojmë kushte të mira për jetesë qytetarëve tanë. Ne e veçuam këtë rast dhe familja Abazi është bërë tani me shtëpi të re për jetesë” ka thënë Ymeri duke uruar familjen e Ismet Abazit që në shtëpinë e re të kenë një jetë të lumtur dhe ta trashëgojnë.

Ndërsa Srgjan Popoviq Drejtor për çështje të komuniteteve nga Zyra e Kryeministrit theksoi se bashkëpunimi me Kryetarin e Komunës së Novobërdës Bajrush Ymeri është duke vazhduar, dhe ne urojmë që kjo familje ta gëzoj këtë shtëpi tash e tutje pasi që ka jetuar në kushte të rënda.

Ndërsa kryefamiljari Abazi shprehu falënderime të veçanta për të gjithë Institucionet qendrore dhe ato lokale që kanë ndihmuar ndërtimin e shtëpisë së tij./rajonipress/